SALM 97:1-12

Bawipa teinak

97. 1 Bawipa cu siangpahrang a si! Vawlei cu i nuam seh, tikulh tampi hna cu i lawm hna seh. 2 Minmei le khuadawm nakpi hna nih an kulh, a bawi thutdan cu khamh-dinnak le biaceih lairelnak ah an hram an bunh. 3 Mei nih hmai a sakpiak, kiangkam a ral vialte cu a khangh dih hna; 4 a nimtlau-lek nih vawleipi cu a ceuh, vawlei nih a hmuh i a ther.

5 Bawipa hmai ah cun vawlei dihlak le tlang hna cu khuailul bang an ti. 6 Van hna nih khin a khamh-dinnak cu an thanh, miphun dang vialte nih a sunparnak cu an hmuh. 7 Milem a rianh mi vialte hna, an sialsal aa uanpi mi vialte hna cung ah ningzahnak tlung ko seh; nannih pathian vialte hna, a hmai ah cun kun tuah u.8 Zion nih a theih i aa lawm, Judah fanu hna cu lawm in an laam, cucu, Bawipa, na biaceih lairelnak thawng a si. 9 Zeicahtiah nang cu Bawipa, vawlei cung dihlak i Cungnung Bik na si, pathian dang vialte cu na tei dih hna.

10 Bawipa nih cun thatlonak a hua mi kha a dawt hna, amah a zum mi hna cu himnak a pek hna, michia kut in a chanh hna.11 Miding hna ca ah ceunak, milungthiang hna ca ah nuamhnak a tlaang. 12 Nannih miding hna, Bawipa ah i lawm tuah u, philh khawh lo a thiannak cu thangthat tuah u.