SALM 108:1-13

Zing hlathiang le miphunpi thlacamnak

108 1 Pathian, ka lung cu timhcia a si ko, hla ka sa lai i ringawn dawh ka thlah lai; maw ka sunparnak, ra cang tuah! 2 Tingtang le thanglawi hna, i hlau tuah u, Zing niceu cu ka thangh lai! 3 Bawipa, nangmah cu miphun dang hna lak ah kan thangthat lai, miphun dang hna lak ah ringawn dawh in kan thangthat lai, 4 zeicahtiah a fek mi na dawtnak cu van hna nak le zumhtlak na sinak cu khuadawm hna nakin an sang deuh.

5 Pathian, nang cu van hna cung ah khin bawi law na sunparnak cu vawleicung pumpaluk cung ah tlang seh. 6 Na dawt mi hna na chanh hna i na orhlei kut in na khamh hna naklai kan let tuah. 7 Pathian nih a hmunthiang in bia a chim, ‘Teinak he Shekhem cu ka cheu lai i Sukkoth Nelrawn cu ka cheuh dih hna lai,’ 8 Gilead cu keimah ta, Manasseh zong keimah ta a si. Efraim cu ka lu ca ah luchin, Judah cu ka ralbawi thiang`hunh a si. 9 Moab cu kaa tawlnak ding ka khengkuar, Edom ah ka kedan ka chiah, Filistia cung in teinak cu ka thanh lai.’

10 Ralhruang-khualipi tuk awk ah aho nih dah a ka hruai lai, aho dah Edom lei ah a kan hruai lai. 11 A rak kan hlawtu Pathian, nangmah dah ti lo aho dah a um ti? Pathian, kan ralkap hna he na kal ti hna lo. 12 Harnak kan ton caan ah bawmhnak kan pe tuah, minung bawmhnak cu zeisan hmanh a tlai lo. 13 Pathian he cun thil lianngan kan tuah lai, kan ral cu a ke in a cil dih hna lai.