SALM 148:1-14

Ser mi hna i thangthatnak hna

148 . Alleluia!

Van in Bawipa cu thangthat u, amah cu cungsang ah khin thangthat u. 2 A vanmi vialte hna, amah cu thangthat u. A van ralkapbu vialte hna, amah cu thangthat tuah u! 3 Nika le thlapa hna, amah cu thangthat u, a ceu mi arfi vialte hna, amah cu thangthat u, 4 a sang bik van hna, amah cu thangthat u, cung van hna cung i ti hna, amah cu thangthat tuah u. 5 Bawipa min cu thangthat hna seh, annih cu a bia in ser mi an si. 

6 Thlen khawh lo mi a nawlchuah in zungzal ca ah a ser hna. 7 Bawipa cu vawlei in thangthat u, a nawl a ngai mi rili saram pipi hna le tithuk vialte hna, 8 mei le rialti, hawhra le dap le thlichia vialte hna amah cu thangthat tuah u. 9 Fing le tlang kip, kuhthing le sidar kung kip, 10 ram saram le innzuat satil vialte, rungrul le thla-ngei vate vialte. 

11 Vawlei siangpahrang hna le miphun vialte hna, bawi le vawlei biaceihtu vialte hna, 12 tlangval le ngaknu vialte hna, upa le ngakchia vialte hna, hmunkhat in, Bawipa cu thangthat u. 13 Bawipa min cu thangthat hna seh, zeicahtiah amah min lawng a sunglawi, lei le van cu a sunpar ceunak in a khat. 14 Zeicahtiah amah a zumtu hna, Israel fale hna, amah naih i a um mi hna thangthatnak ca ah a mi cu an tha a thawnter hna.