SALM 104:1-35

Sermi thil hna sunparnak

104. 1 Ka thlarau, Bawpa cu thang`hat tuah, Bawipa ka Pathian, zei tluk in na lianhngan! 2 Sunpar lianhngannak kha naa thuam, ceunak cu angkifual bang naa hruk. Van hna cu deuthlam bang na samh, 3 na innpi cu cung ti hna ah khin na sak, minmei cu na leeng ah na ser, thli hna thla in na zuang, 4 thli cu na thawng thanhtu ah le meizik cu na salle hna ah na thim hna.

5 Vawlei cu a hramdomh ah fek tein na bunh, zeitik hmanh ah aa hnin ti lai lo, 6 hnipuan bang ti thukpi in na khuh, ti cu tlang hna lonh in an kai. 7 Na hro hna tik ah ti cu an zam, na aw hrumpi an theih tik ah khulrang in an tli, 8 tlang hna in horkuang lei ah an tum i an ca ah na timhpiak mi hmun ah an lut; an luannak ding ramri na serpiak hna, cucu kir in vawlei kha an khuh nakhnga lo caah a si. 10 Vacek hna ah khan cerhti na putter, tlang hna kar in an luang, 11 saram vialte kha din awk ti an pek, ramlak laa hna nih diriam in an din, 12 vate cu tikam hna ah bu an ser, thing `engnge

hna ah khan hla an sa. 13 Cung na khaanpi in tlang cu ti na run toih, vawlei cu na riantuannak theipar in na khimter:14 satil hna ca ah ram le minung ca ah an herh mi thingram na khohter, cucu vawlei in thlairawl chuahter awk le 15 an lung nuamhnak ca mitsur zu chuahter awk, an hmai tleuter awk ah chiti le an lung thawnter awk ah rawl chuahter awk ah a si.

16 Bawipa nih a vorh mi thingkung hna, Lebanon sidar kung hna nih vuai tein an ding, 17 vate hna nih a cung ah an bu an ser, a dongpar ah khin vaca hna cu an bu an ser hna; 18 cun sathar hna ca ah tlangram hna an um i lungkua hna chung ah khan sahniar hna cu dornak an hmu. 19 Khuacaan thentu ah thlapa a ser, nika nih a tlak caan a hngalh. 20 Khuamui na chuahter i zan a si, cun saram vialte cu an vak; 21 chiandeih no hna cu sa kawl in an hrum, Pathian kha rawl an hal.

22 Ni a chuah tik ah an kua chung i dinh awk ah an i zuk than, 23 cun minung cu riantuan ah aa thawh, zanlei tiang a tuan. 24 Bawipa, na tuah mi hna cu an va tam hringhran dah, an dihlak in fimnak in na ser hna. Vawlei cu na ser mi thil in a khat. 25 Rili kaupi a um, a ngan he a hme he, rel cawk lo saram in a khat, 26 tilawng hna cu a

kenkip ah an vak, cun lente naa celhnak Leviathan zong a um ve. 27 An zapi tein, an herh caan rawl fah hna awk ah nangmah kha an in hngak. 28 An khon mi tirawl cu na pek mi hna an si, na zapei nem nih an khim tiang a pek hna. 29 Naa merhtak hna tik ah tihphan thlalau in an um; an thaw na lak than i an thi, cun leidip ah an kir than. 30 Na thaw na thlah than i nunnak aa thawk than; vawlei hmai cu na tharchuah. 31 Bawipa cung ah sunparnak um zungzal ko seh! Bawipa cu a ser mi hna cung ah i lawm ko seh! 32 A vun zoh tik ah vawlei cu a ther, a tawngh hna tik ah tlang cu an kang hna.

33 Ka nunchung vialte Bawipa cu hla in ka thangthat lai, ka nunchung vialte ka Pathian sin ah ringawn dawh ka thlah lai. 34 Kaa nuamhnak nih a lung tong hram seh, zeicahtiah Bawipa nih nuamhnak a ka pek. 35 Misual hna cu vawlei in lotlau dih hna seh, mithalo hna cu um ti hna hlah seh. Ka thlarau, Bawipa cu thang`hat tuah.