SALM 107:1-43

Tihphannak chung in i dornak, Pathian ,Alleluia!

107. 1 Bawipa cu a that caah lawm tuah u, zeitintiah a fek mi a dawtnak cu zungzal in a hmun. 2 Bawipa nih a khamh mi hna, ral kut chung in a tlanh mi, hna nih chim hna seh, 3 annih kha ramdang in, nichuahlei le nitlaklei in, chaklei le thlanglei in a kirpi hna. 4 Thetse ram, ramcar lak ah khan an rak vakvai, minung umnak khualipi pakhat hmanh an hmu kho lo; 5 an rawl a tam i an ti a hal, an nunnak cu a dih cuahmah ko. 6 An ngaihchiatnak chung in Bawipa sin ah an au, an harsatnak in a chanh hna, 7 mi umnak khualipi lei kalnak lam cung ah a chiah hna. 8 Bawipa cu a fek mi a dawtnak caah lawmh hna seh, Adam fale hna ca i a tuah mi khuaruahharnak caah lawmh hna seh! 9 Ti hal kha an tihal a riamter hna, a rawl a tam mi kha thil thatha in a khahter cang hna.

10 Thir cikcin he zaangfah awk in mithi khua tum bang ngaichiatnak chummui lak ah an vakvai. 11 Cucu Bawipa nawl kha an buar i Cungnung Bik khuakhan lairelnak kha zei ah an rel lo caah a si, 12 rianhrang in an lung a nemter; an tlukrilh tik ah bawmtu ding aho hmanh an ngei lo.

13 An temhinnak chung khan Bawipa sin ah an au i an harnak chung in a chanh hna, 14 thihnak khuamui le thladem chung in a chuah hna, an thir cikcin cu a chahpiak hna. 15 A fek mi a dawtnak caah Bawipa cu lawm hna seh; Adam fale hna ca i a tuah mi khuaruahharnak hna caah lawm hna seh. 16 Dar kutka cu a bauh hna i thir tlang hna cu a khiah dih hna.

17 Chimh ngai lo an nun ning an i hruhpi i an sual caah zaangfah awk ngai an si, 18 rawl vialte cu an fih i thlanmual an naih ko cang hna. 19 An ngaihchiatnak chung in Bawipa sin ah an au, an harnak in a chanh hna, 20 a bia a thlah i a damh hna, cun an nunnak cu mithi khua in a chuah hna. 21 A fek mi a dawtnak caah Bawipa cu lawm hna seh, Adam fale hna ca i a tuah mi khuaruahharnak caah lawm hna seh! 22 Lunglawmh thawinak cu pechan hna sehlaw a rak tuah mi hna cu lawmhnak authawng he chim hna seh.

23 Rili cung khual a tlawng mi hna nih, rilipi cung i chaw a let mi hna nih, 24 Bawipa nih tithukpi chung i a tuah mi hmelchunhnak hna cu an hmuh hna. 25 A bia in thlichia a thawhter, tilet cu sangpi tiang a kaiter. 26 Van tiang an kai i thukpi tiang an tum than. An thin lawng an i domh, 27 zuri bang an sawn i an vak, an thiamnak vialte cu pakpalawng an si cang.

28 An harnak chung in Bawipa sin ah an au, an ngaihchiat `ahnak in a chanh hna, 29 thlichia cu a daihter, ti cu dai tein an um, 30 cun, tilet a daih hmuh in lawmhnak he a khat mi annih cu an i timhnak tikam ah a chuahpi hna. 31 A fek mi a dawtnak caah Bawipa cu lawm hna seh, Adam fale hna ca i a tuah mi khuaruahharnak caah Bawipa cu lawm hna seh. 32 Pumhnak pi ah amah cu conglawmh hna sehlaw upa hna khawngsil ah thangthat hna seh. 33 Tiva hna cu ramcar ah a canter hna, cerh cu ram rocar ah, 34 vawlei tha cu cite vawlei ah a thlen hna, zeicahtiah khika i a um mi hna cu mithalo hna an si. 35 Sihmanhsehlaw thetse ram cu tili ah, ram rocar cu ti a put thluahmah mi cerh ah a thlen hna i 36 a rawl a tam mi cu umnak a pek hna, cuka ah cun khualipi an i ser. 37 Khika ah lo an i ser i mitsur an cin, cun thlairawl cu an zun hna. 38 Thluachuah a pek hna i an milu a karhter, an satil run cu an zor lo. 39 Zawtfahnak le harsatnak ruangah an milu a zor i an tha a tum, 40 bawi fapale hna cu ningzahnak he a khahter hna, lam a um lonak ramcar lak ah a vah vaihter hna.

41 Sihmanhsehlaw miharsa cu an sifahnak in a chuah hna, an chungkhar cu tuurun bang a karhter. 42 Hihi an hmuh tik ah milungthiang hna cu an i lawm i mi`halo hna cu chim awk an ngei lo. 43 A fim mi aho dah a um? Cu bantuk mi nih hi hna hi ruat in Bawipa i a fek mi a dawtnak cu a lung a fian awk a si.