SALM 118:1-29

Deu puai ca aa tlar in luhnak hla

Alleluia!

118 1 Bawipa cu a that caah lawm tuah u, zeicahtiah a fek mi a dawtnak cu zungzal in a hmun. 2 ‘Israel Chung nih, ‘A fek mi a dawtnak cu zungzal in a hmun,’ ti hna seh, 3 Aaron Chung nih, ‘A fek mi a dawtnak cu zungzal in a hmun,’ ti hna seh. 4 Bawipa a tih mi hna nih, ‘A fek mi a dawtnak cu zungzal in a hmun,’ ti hna seh.

 5 Ka ngaihchiatnak chung in Bawipa cu ka auh, a ka theih i a ka chuah. 6 Bawipa ka pawng a um tik ah zei hmanh ka tih ti lo; minung phun nih zei dah an tuah khawh lai? 7 Bawmtu ah Bawipa cu ka pawng ah a um, ka ral hna an sungh caah ka lung a hmui. 8 Minung i hngatchan nakin Bawipa toi ah i dor a tha deuh; 9 bawi fale hna i hngatchan nakin Bawipa toi ah i dor a tha deuh. 

10 Miphun hna nih an ka buk, Bawipa min in ka saam dih hna; 11 an ka kulh i an ka nam, Bawipa min in ka saam dih hna. 12 Khuai hna bang in an ka buk, burbuk mei bang an kang, Bawipa min in ka saam dih hna. 13 Ka tluk ding in an ka namchih, sihmanhsehlaw Bawipa cu keimah bawmh awk ah a ra. 14 awipa cu ka thazaang le ka hla a si, ka khamhtu a si zungzal. 

15 Miding hna thlam ah lawmhnak le khamhnak authawng a thang, ‘Bawipa orhlei kut nih a tei cang,’ 16 Bawipa i orhlei kut cu teitu a si, Bawipa i orhlei kut nih a tei cang!’ ti a si. 17 Ka thi lai lo, ka nung lai, Bawipa tuah mi thil lianngan cu ka chim hna lai. 18 Bawipa nih fak ngai in dat a ka tat nain thih cu a ka siang lo. 19 Khamh-dinnak kutka cu ka hunpiak tuah u, ka lut lai i Bawipa cu ka thangthat lai. 

20 Hihi Bawipa kutka a si, miding hna cu hika hin an lut. 21 Ka thlacamnak na theih i ka khamhtu ah naa ser cang caah nangmah cu kan lawmh. 22 Innsa hna nih an hnon mi lung cu innkil lung ah a cang cang; 23 cucu Bawipa tuah mi a si i kan khuaruah a har. 24 Nihin cu Bawipa nih a tuah mi ni a si, i lawm ulaw i nuam u. 

25 ‘Bawipa, kan khamh ko,’ tiah kan in nawl ko, Bawipa, teinak kan pe tuah,’ tiah kan in nawl. 26 Bawipa min in a ra mi cung ah thluachuahnak um ko seh! Bawipa inn in thluachuah kanin pek hna. 27 Bawipa cu Pathian a si, ceunak a kan pek. Thinghnah i put in aa tlar tein kal tuah u, biaktheng kil lei ah cun panh tuah u. 28 Nang cu ka Pathian na si, kan lawmh, ka Pathian, mi vialte nih an in thangthat. Ka thlacamnak na theih i ka khamhtu ah naa ser caah kan lawmh. 29 Bawipa cu a `hat caah lawm tuah u, zeicahtiah a fek mi a dawtnak cu zungzal in a hmun.