SALM 21:1-13

Siangpahrang luchin chinhnak puai ca

21. 1 Bawipa, siangpahrang cu na `hawnnak ah aa nuam. Na khamh bawmhnak nih zei tluk in dah lawmhnak in a khahter! 2 A saduhthah na tlinter, a hmurka in a thlacamnak cu na hlaw lo. 3 Zeicahtiah rumnak thluachuah he amah ton awk ah na ra, a lu ah sui mansung luchin na chinh. 4 Nunnak an hal, amah cu nun khuasaunak kha na pek. 5 Na khamh-bawmhnak thawng in sunparnak nganpi a hmuh; sunpar lianhngannak in na thuamh. 6 A hmun mi thluachuahnak na pek, na umnak i nuamhnak he na khahter. 7 Zeicahtiah siangpahrang nih Bawipa cu aa bochan; Cungnung bik i a fek mi dawtnak nih amah cu tlukrilhnak in a khamh lai. 8 Na kut nih na ral vialte, na orhlei kut nih an huatu vialte, cu a banh hna lai. 9 Na langh ni ahcun annih kha a alh hluahmah mi meiphu chung ah na thlak dih hna lai. Bawipa nih annih cu a thinhunnak chung a erhkumh hna lai i mei nih a kangh dih hna lai. 10 Vawlei in a tefa hna, a tefa minung phun, cu na thianh dih hna lai. 11 Zeicahtiah nangmah ralchanh in khuakhannak `halo kha an rak tuah cang, zei tluk an tuah len zong ah an hlawh a tling lai lo, 12 zeitintiah na thal in hmaitonh in na kah hna tik ah an zam dih te ko lai. 13 Bawipa, na lianhngannak he tho tuah! Na `hawnnak upat in ringawn tum in hla kan sa lai.