SALM 145:1-21

Siangpahrang Pathian thangthatnak

145 1 Pathian le ka siangpahrang, nang cu vansang ah kan thangthat lai, na min cu zungzal in zungzal tiang ka conglawmh lai. 2 Nikhat hnu nikhat kan conglawmh lai, na min cu zungzal in ka thangthat lai. 3 Bawipa cu a lianngan i thangthatnak vialte co aa tlak, a lianhngannak cu hngalh khawh cawk a si lo. 4 Na tuahsernak i thang`hatnak cu chan khat nih adang chan ah a thanh lai, thil lianngan na tuah mi cu a phuan lai. 5 Na minthannak cu na sunparnak ceunak a si, khuaruahhar na sinak tuanbia cu ka ruat len hna lai.

 6 Khuaruahhar na huham cu an chim lai i na lianhngannak cu ka chimthan hna lai. 7 Philh  awk thalo na veelngeihnak liangluang cu an chuahpi than hna lai i lawm in na khamh-dinnak cu an thanh lai. 8 Bawipa cu minunnem le zaangfahthiam a si, a thin a fual i a fek mi dawtnak in a khat. 9 Bawipa cu mi vialte cung ah vel a ngei, a nunnemnak cu ser mi thil vialte ca ah a si. 10 Bawipa, na ser mi vialte nih anin thang`hat lai i an zumtu hna nih an in conglawmh lai. 

11 Na siangpahrang sunparnak cu an phuan lai i na lianhngannak cu an chim lai, 12 Adam fale hna kha thil lianngan na tuah mi, na siangpahrang sinak i sunpar le lianhngannak cu an theihter hna lai. 13 Na siangpahrang sinak cu zungzal siangpahrang sinak a si, na pennak cu chankhat hnu chankhat tiang a hmun. Bawipa bia vialte cu zumhtlak an si i a tuah mi vialte cu a ding. 14 Bawipa nih cun a tlu mi kha a thawh hna i a kun mi kha a cawi hna. 15 Zeizong vialte nih nangmah cu ruahchannak he anin zoh i khuacaan chuak thlairawl in na cawm hna. 

16 Cun, velngeihnak he na ser mi thilnung vialte cu an duh mi kha na pek hna. 17 Bawipa cu a tuah mi vialte ah a ding, a fek mi dawtnak he lawng in a cawlcang. 18 Amah a autu vialte hna, an lungthin dihlak in a sin a au mi vialte naih ah a um. 19 Amah a daw mi vialte cu an duh a tling hna, an tahnak kha a theih i a khamh hna. 20 Bawipa nih amah a daw mi vialte cu a ven hna, sihmanhsehlaw mithalo hna cu a hrawh dih hna. 21 Ka hmurka nih Bawipa cu a thangthat zungzal lai, ser mi vialte nih a min thiang cu thangthat hna seh, zungzal in zungzal tiang.