SALM 79:1-13

Miphunpi `ahnak

79. 1 Pathian, lawki mi hna nih na roco hna ram cu an chim i na biakinn thiang cu an buar cang, Jerusalem cu an hrawh dih cikcek cang, 2 na salle hna ruak cu van vate hna rawl ah le an zumtu hna pum cu sahrang hna rawl ca ah an kaltak cang hna. 3 Jerusalem velchum ah thi cu ti bang an thlet i a vuitu ding aho hmanh an um ti lo. 4 Kannih cu kan innpa hna nihsawh awk, kan pawngkam hna capo saih awk le zomhtaih awk men kan si cang. 5 Bawipa, zeitik tiang dah na thin a hun lai? Zungzal in maw? Na nahchuahnak nih maw mei bang a kan kangh dih ne ko lai? 6 Na thinhunnak cu nangmah an cohlang lo mi miphun hna le na min a au lo mi pennak hna cung ah toih ko, 7 zeicahtiah annih nih Jacob cu an ei an `am i a inn vialte cu an hrawh dih cang.

8 Hlan minung hna sualthurnak hna cu kan cung ah chuang sawh hlah, na zaangfah dawtnak he kanmah ton awk ah rianrang in ra ko cang, 9 kan tha a dih cikcek cang caah, kan khamhtu Pathian, na min sunparnak ca ah kan bawm ko. Bawipa, kan sualnak cu hnawt hna law na minthannak ca ah kan chanh ko sawh. 10 Zeiruangah dah miphun dang hna nih, ‘Khuazei ah dah an Pathian a um?’ tiin an hal lai. Na salle hna thisen an thlet caah miphun dang hna teirulchamnak an tuar cu hmu hram usih. 11 Saltang hna an `ahnak cu na sin ah phan ko seh, na lianhngan `hawnnak thawng in thih ding bia an ceih mi hna cu khamh ko hna. 12 Bawipa, na cung ah an chim mi zomhtaihnak caah kan innpa hna cu letsarih in cham ko hna. 13 Cun kannih na mi, na khalh mi na tuurun, nih nangmah cu zungzal in kan in thang`hat lai, na thang`hatnak cu chankhat hnu chankhat kan chim lai.