SALM 147:1-20

Zeizong tuahkho sin phan mi hla thiang

147. 1 Alleluia!

Bawipa cu thangthat u -kan Pathian sin ah saam hla sak cu a tha - amah thangthat cu zei tluk in a nuamh. 2 Jerusalem cu Bawipa nih a sak than lai! Israel saltaang hna cu hmunkhat ah a pumh hna, 3 a lung a kuai mi kha a damh hna i an hma kha a tuampiak hna; 4 arfi cu a rel hna i pakhat cio kha an min a pek hna. 5 Kan Bawipa cu a lianngan, a thawng, a fimnak cu chim cawk ding a si lo. 

6 Bawipa nih misifak cu a cawm hna, mithalo cu vawlei ah a thumh hna. 7 Bawipa sin ah lawmhnak hla sa tuah u, kan Pathian ca ah tingtang tum tuah u. 8 Van cu minmei in a thuamh i vawlei cu ruahti a pek, ram cu tlangpar ah le thingkung cu minung hman awk ah a kheoter, 9 satil cu rawl a pek i langak no cu an au tik ah rawl a pek hna. 10 Rang thawnnak ah aa lawm lo, minung thawnnak ah a lung a hmui lo; 

11 aa nuamhnak cu amah a tih mi hna, a fek mi a dawtnak aa bochan mi hna caah a si. 12 Jerusalem, Bawipa cu thangthat tuah, Zion, na Pathian cu thangthat tuah. 13 Zeicahtiah na kutka tlang cu a fehter hna, na chung i na ngakchia hna cu thluachuah a pek hna, 14 na ramri ah daihnak a ser, a thaw bik mi changvut in an khimter. 15 Vawlei ah a bia cu a run thlah i a nawl cu khulrang in rian an tuan,

 16 Hawhra kha tuuhmul bang le dap kha vutcam bang a zamter, 17 rialti cu changreu par bang a tlakter i aho nih dah a kik cu a celh lai? 18 A bia cu a thlah tik ah annih cu an ti, a thli a hranter tik ah ti cu an luan. 19 Jacob sin ah a bia le Israel sin ah a phunglam le a biaceih lairelnak cu a phuan. 20 Zeicahtiah khuazei miphun sin hmanhah hiti hin a tuah lo, midang aho hmanh nih a biaceih lairelnak cu an hngal lo.