SALM 102:1-28

Vanchiat ton caan thlacamnak

102. 1 Bawipa, ka thlacamnak cu ka ngai piak ko, bawmh hal in kan aunak cu na sin phan hram seh. 2 Ka re a theih tik ah ka mertak hlah, rung kun law ka ngai ko, kan auh tik ah khulrang in ka let ko sawh.3 Zeicahtiah ka kum cu meikhu bang an liam thluahmah cang, ka ruhkhua cu mei bang an lin, 4 ni nih a emh mi ram bang ka lung cu a uai cang, Rawl ei ka philh. 5 Teima in ka hrum nakah ka ruh hna cu an lang dih cang.

6 Kei cu hnawm pon lak i kingro chimbu, hmunrawp i a hrum mi chimbu bang ka si cang.7 Thlungkhuh cung amah lawngte a to mi vate bang zan khuadei hngilh lo in ka hram. 8 Chun nitlak ka ral hna nih an ka serhsat, hlan ah a rak ka thang`hat mi hna nih atu ah cun chiatserhnak ah an ka hman cang. 9 Ka ei mi rawl cu vutcam, ka din mi ti cu mitthli he aa cawh mi ti a si, cucu na thin hunnak le na thin linhnak ruangah a si, 10 zeicahtiah thlak awk men ah na rak ka cawi; 11 ka kumkhua cu a liam cuahmah mi thladem ko khi an si, ramhnah bang ka uai ko cang.

12 Sihmanhsehlaw Bawipa, nang cu zungzal in na bawi, chan khat hnu chan khat an in philh lo. 13 Tho law Zion cu zaangfah ko cang! zaangfahnak caan a phan cang, a caan a phan cang, 14 zeicahtiah na salle hna nih a lung hna tiang kha an tlaihchan, a leidip hna hmanh zaangfah an hauh cang. 15 Cu tik ah miphun dang hna nih Bawipa min an `ihzah lai i vawlei siangpahrang vialte nih na sunparnak cu upatnak an pek lai; 16 Bawipa nih Zion a sak than tik ah a sunparnak he hmuh a si te lai; 17 miharsa hna thlacamnak theihpiak awk ah aa mer lai i an thlacamnak cu zei rel lo in a um ti lai lo.

18 Hihi cu chan thar hna ca ah tial an si lai i a chuak rih lo mi hna nih Pathian cu an thangthat lai: 19 Bawipa cu a sannak a hmunthiang in, van khin vawlei cu a kun i a run zoh, 20 saltaang hna an hrum-ainak kha ngaihpiak awk ah le thihdan pek mi hna kha luatnak pek awk ah a si, 21 Bawipa min cu Zion ah le a thang`hatnak cu Jerusalem ah thanh awk ah a si; 22 miphun dang hna le pennak hna cu Bawipa biak awk hmunkhat ah an i pum te lai.

23 Ka khuallam ah ka tha a dih; a tang mi ka nunnak caan-tawi te cu ka hngalhter ko. 24 Ka chantim hlan ah ka la hlah, zeicahtiah nang na chan cu chantlung a si. 25 Hlanpi ah khan vawlei hrampi cu na rak domh, van hna cu na kutzung an si. 26 Annih cu an liam nain nang cu na hmun; annih cu hnipuan bang an `et, hnipuan `hing bang na thlen hna, sihmanhsehlaw nang cu naa thleng bal lo, 27 cun na chan zong a dong bal lo. 28 Nangmah an rianh mi na fale hna cu him tein khua an sa lai; an tefa hna cu na hmai ah an um zungzal lai.