SALM 119:1-176

Pathian Phungbia thangthatnak

119. 1 An nun ah soisel awk a um lo i Bawipa Phungbia a zul mi hna cu zei tluk thluachuak an si! 2 A cawnpiaknak a zul i an lungthin dihlak in amah a kawl mi hna, 3 that lonak zei hmanh tuah lo in a phunglam a zul mi hna, cu zei tluk thluachuak an si! 4 Fel tein zulh awk ah na phunglam cu na ser. 5 Na duhnak tuahnak ah ka nun cu ding hram seh.

 6 Ka khuacuanhnak cu na nawlbia ah a si ahcun ningzahnak ka tong lai lo. 7 A ding mi na biaceihnak lairelnak na ka cawnpiak caah lungthin thiang tein kan lawmh. 8 Na duhnak cu ka tuah ko lai, ka kaltak bal hlah. 9 Zeitin dah tlangvalno cu soisel awk um lo in a tlonlen khawh lai? Na bia zulhnak lawng in a si kho. 10 Ka lungthin dihlak in kan kawl, na nawlbia in ka pialter bal hlah. 

11 Na cung ka sual nakhnga lo na biakam cu ka lung ah ka camter zungzal. 12 Bawipa, na cung ah thluachuah vanluhnak um ko seh, na duhnak cu ka cawnpiak ko! 13 Ka ka in biaceihnak na tuah mi vialte cu ka chim zungzal hna. 14 Ka lunglawmhnak cu na ka chimhrinnak lamthluan ah a um, chawva vialte nakin a sunglawi deuh mi nuamhnak a si. 15 Na phunglam cu ka ruat hna lai i na lam cu mitthep lo in ka zoh hna lai. 

16 Na duhnak tuah ah lunglawmhnak ka hmuh, na bia cu ka philh hna lo. 17 Na sal cu vel ka ngeih law ka nung lai, cun na bia cu ka zul hna lai. 18 Ka mit ka hunpiak law ka khuacuanhnak cu khuaruahhar na Phungbia ah si hram seh. 19 Kei cu vawlei ah mivakvai ka si nain na nawlbia cu ka hmai in thup sawh hlah. 20 Ka lung cu zunzal in na biaceih lairelnak a hlam nakah a ba cang. 

21 Na nawlbia in a pial mi, mipuarhrang, chiatserhmi hna cu na hro i na sik hna. 22 Na ka cawnpiaknak ka zulh hna caah serhsat zawmhtaihnak in ka luatter ko. 23 Bawi fapale hna cu keimah rawiphiarnak ding khua an khaang nain na salpa kei cu na duhnak lawng ka ruat ko. 24 Na cawnpiaknak cu kaa lawmhnak le ruahnak tha a ka petu an si. 25 Vawlei ah ka tla i ka bawk; na bia bang thazaang ka pe than tuah. 

26 Ka lam cu kan chimh i na ka leh; na duhnak cu ka chim tuah. 27 Na phungbia lam cu ka hmuhsak law na khuaruah harnak cu ka ruat hna lai. 28 Lungfak in ka ciam dih deng cang, na bia bang in ka cawi tuah. 29 Hlennak lamthluan in ka himter tuah, na Phungbia i thluachuahnak cu ka pe ko. 30 Zumhtlak sinak lamthluan cu kaa thim cang; na biaceihnak lei hoih in kaa sersiam cang. 

31 Na ka cawnpiaknak cu kaa tlaihchih, Bawipa, ka lung ka rawhter sawh hlah. 32 Na nawlbia lamthluan in ka le, zeicahtiah nangmah nih lungthin zalonnak kha na ka pek cang. 33 Bawipa, na duhnak lam cu ka chim law ka zulh lai. 34 Lungtliannak ka pe law na Phungbia cu ka zulh hna lai, ka lungthin dihlak in ka zulh hna lai. 35 Na nawlbia lamthluan in ka hruai, zeicahtiah ka lunglawmhnak cu mahka ah a um. 

36 Ka lungthin cu duhfahnak lei si lo in na cawnpiaknak lei ah kuaih ko. 37 Ka mit cu sullam ngei lo milem hna in mer, na bia thawng in nunnak ka pe ko. 38 Na sal cung ah na biakamnak cu tlinter ko, cuticun mi vialte nih khuaruah har in an i zoh lai. 39 Ka tih mi nihsawhnak hna cu ka thialpiak ko hna, zeicahtiah na biaceih lairelnak cu siannak he a khat. 40 Zei tluk in na phunglam cu ka duh ti cu hmu tuah, na khamh-dinnak in nunnak ka pe ko.

41 Bawipa, a fek mi na dawtnak cu ka cung ah phan ko seh, na biakamnak bang in ka khamh ko. 42 A ka nihsawhtu hna cu bia kaa khat in leh ko hna ning, zeicahtiah keimah cu na bia kha kaa hngatchan. 43 A hmun mi na bia cu ka lakpiak sawh hlah, zeitintiah kaa ruahchannak cu na biaceihnak ah a si. 44 Na Phungbia cu pel lo zungzal in ka zulh lai. 45 Zalennak cu tling tein ka hmu lai, zeiruangah tiah kei cu na phunglam a kawl mi ka si. 

46 Na ka cawnpiaknak cu siangpahrang hna hmai ah ka chim lai, ka ning a zah lai lo. 47 Na nawlbia nih lawmhnak in a ka khahter, ka tlaihchan hringhran hna. 48 Ka duh mi na nawlbia hna lei ah ka kut ka zao, cun na biaceih lairelnak cu ka ruat hna. 49 Na sal sin i na biakamnak cu philh hin hna hlah, annih cu ka ruahchannak hna an si. 50 Ka ngaihchiat caan ah hnemhnak an si, na biakamnak nih nunnak a ka pek. 

51 Mipuarthau nih dong lo in an ka tarh, sihmanhsehlaw na Phungbia in ka pial bal lo. 52 Bawipa, hlanpi in na biaceih lairelnak cu ka lung chung ah ka rak chiah peng ko, cun hnangamnak ka hmuh. 53 Na Phungbia a kaltak mi mi`halo ka hmuh hna tik ah ka thin cu mei bang a lin. 54 Ralzam in  ka umnak ah na biaceih lairelnak cu ka hla an si. 55 Bawipa, zan khuadei, na min cu ka lung ah ka camter, na Phungbia cu ka zulh. 

56 Kei ka ca ah na phunglam zulh cu hihi a si. 57 Bawipa, ka chim cang, ka rian cu na bia zulh hi a si. 58 Ka lungthin dihlak in na mithmaitha ka kawl; na biakam bang in ka zaangfah ko! 59 Ka lamthluan cu ka ruat than i ka karhlan cu na cawnpiaknak lei ah ka mer. 60 Na nawlbia zulhnak lei cu kaa hnawh. 

61 Mithalo hna rap ah kaa awh nain na Phungbia cu ka philh lo. 62 Na biaceih lairelnak cu a dik caah nangmah thangthat awk ah zan`im ah ka tho. 63 Kei cu nangmah an daw mi le na phunglam a zul mi vialte i hawi ka si. 64 Vawlei cu a fek mi na dawtnak in a khat, Bawipa, na biaceih lairelnak cu ka cawnpiak tuah. 65 Bawipa, na biakam bang in, na sal cung ah na rak siang cang. 

66 Na biaceihnak le hngalhnak cu ka cawnpiak ko, zeicahtiah kei cu na nawlbia kha kaa hngatchan. 67 Chimhhrin ka ton hlan cu ka rak pial, sihmanhsehlaw atu cu na biakamnak ka zulh cang. 68 Nang cu na siang i velngeihnak he na cawlcang, na duhnak ka cawnpiak tuah. 69 Na phunglam cu ka lungthin dihlak in ka zul ko nain mipuarthau hna nih an ka thangchiat. 70 An lung cu sathau tlangpi bang a khal, sihmanhsehlaw ka lunglawmhnak cu na Phungbia ah a si. 

71 Temhinnak ka rak tuar cu ka ca ah a tha; na biaceih lairelnak tha deuh in hngalhnak a si. 72 Na phuan mi na Phungbia cu ka ca ah lei chawva vialte nakin an sunglawi deuh. 73 Na kut nih a rak ka ser i a ka domhtlaih, lungtliannak ka pe law na nawlbia cu ka cawn hna lai. 74 Nangmah an tih mi hna cu na hmaika ah an i nuam, zeitintiah kaa ruahchannak cu na bia ah a si. 75 Bawipa, na biaceihnak hna cu an hmaan ti cu ka hngalh, cun dan na ka tatnak in zumhtlak na sinak na langhter. 

76 Na salpa na rak ka kamh bang in a fek mi na dawtnak cu ka lungngamnak a si lai. 77 Ka cung ah nemnak lungthin ngei law ka nung lai, zeicahtiah na Phungbia cu ka lungngamnak a si. 78 Na phunglam ka ruat hna lio ah keimah kong lih a tawn mi hna cu an ning zak seh. 79 Nangmah an tih mi hna le na cawnpiaknak a lung a tliang mi hna cu keimah lei ah tang hna seh. 80 Na duhnak kong ah lungtlin lonak ka ngeih lo caah hmaichiat ka tong lai lo.

81 Na khamhnak caah kei cu ka ciam cang lai, asinain na bia cu kaa ruahchannak a si. 82 Ka mit cu na biakamnak hngah in an phing dih cang, zeitik ah dah na ka zaangfah lai? 83 Zeicahtiah kei cu meikhu cung mitsur dur bantuk ka si cang nain na duhnak cu ka philh lo. 84 Na sal hi zeican tiang in dah ka nun rih lai? Zeitik ah dah a ka hremtu hna cu bia na ceih hna lai? 85 Na Phungbia buar in mipuarthau hna nih ka tlaknak ding khor an cawh. 

86 Na nawlbia vialte nih zumhtlak na sinak cu an langhter, lungthin thalonak he an ka dawi tik ah ka bawm tuah. 87 Vawlei in an ka hloh deng cang, sihmanhsehlaw na phunglam cu ka kaltak rih lo. 88 A fek mi na dawtnak bang nunnak ka pe tuah, cun na ka serpiak mi na cawnpiaknak hna cu ka zulh hna lai. 89 Bawipa, na bia cu vancung ahkhin zungzal fek tein bunh a si. 90 Zumhtlak na sinak cu chankhat hnu chankhat a hmun; vawlei cu na ser i fek tein a dir. 

91 Na biaceih lairelnak thawng in zeizongte cu nihin ni tiang fek tein an um, zeicahtiah ser mi vialte cu na sal an si. 92 Na Phungbia hi ka lunglawmhnak rak si hlah sehlaw ngaihchia in ka rak rawk diam cang lai. 93 Na phunglam cu ka philh bal hna lai lo, zeicahtiah anmah thawng in nunnak na rak ka pek. 94 Keimah cu nangmah ta ka si, ka khamh tuah, zeicahtiah kei cu na phunglam a kawl mi ka si. 95 Mithalo cu keimah hrawh ding kha an i ruahchan kho men, sihmanhsehlaw na cawnpiaknak hi ka ruahchannak cu an si ko. 

96 Tlinnak kan ti mi vialte cu an tling dih lo ti cu ka hmuh cang, sihmanhsehlaw na nawlbia cu tahkhawh lo in a kau i a tling. 97 Zei tluk in na Phungbia cu ka tlaihchan, chun nitlak in ka ruat. 98 Zungzal in keimah ta a si mi na nawlbia thawng in ka ral hna nakin na ka fimter deuh. 99 Na cawnpiaknak cu ka ruah peng hna caah ka saya hna nakin ka fim deuh. 100 Na phunglam ka zulh caah kum upa hna nakin lungtliannak ka ngei deuh. 

101 Na bia zulh duh ah ka ke cu lam `halo hna zulh a hrial. 102 Na biaceih lairelnak cu ka mertak hna lo, zeicahtiah nangmah hrimhrim nih na rak ka cawnpiak. 103 Na biakamnak cu zei tluk in ka dang ah an thlum, ka kaa ah khuaihliti nakin an thlum deuh. 104 Na phunglam hna in fimnak ka hmuh, cucaah hrokhrolnak lam vialte cu ka huat hna. 105 Na bia cu ka ke ca ah mei-inn le ka lam ca ah khuaceu a si. 

106 Chiatserh in bia kaa kam cang-ka let ti lai lo - cucu a ding mi na biaceih lairelnak zulh kha a si. 107 Bawipa, kei cu lak awk tlak lo hrimhrim ka si; na biakam bang nunnak ka pe `han ko. 108 Bawipa, ka hmurka i thangthatnak cu cohlang hram ko law na biaceih lairelnak cu ka cawnpiak ko. 109 Ka nunnak cu nangmah kut ah zungzal in a um, na Phungbia cu ka philh hna lo. 110 Mi`halo hna nih ka lam ah rap an chiah, sihmanhsehlaw na phunglam cu ka pialtak hna lo. 

111 Na cawnpiaknak cu zungzal ca ka rosung an si, annih cu ka lung lawmhnak an si. 112 Na phungphai zulhnak ah ka nunnak cu ka hmang lai, an thluachuah cu zungzal ca a si. 113 Milungrep lo cu ka huat hna i na Phungbia cu ka tlaihchan. 114 Nang cu kaa dornak le ka phaw na si, ka ruahchannak cu na bia ah ka chiah. 115 Nannih mi`halo hna, ka kaltak u, kei cu ka Pathian nawlbia kha ka zulh hna lai. 

116 Na bia bang ka bawm law ka nung lai; ka ruahchannak cu a lak in siter hlah. 117 Ka domtlai law khamh ka si lai, ka khuacuanhnak cu na duhnak tuahnak ah a si. 118 Na duhnak in a pial mi vialte cu na hninh i na thlak hna; an vankam cu lih le hrokhrol in a khat. 119 Na zohnak ah vawlei thatlonak vialte cu cirik men an si, cucaah na cawnpiaknak cu ka tlaihchan hna. 120 Na hmaika ah ka pum cu a ningpi in a ther, na biaceihnak nih tihnak in a ka khahter.

121 Ka nunning vialte cu an hmaan i an ding, a ka hremtu hna kut ah ka chaan sawh hlah. 122 Na sal cu sithatnak ka pe ko, miporhlaw nih ka hrem hlah seh. 123 Na rak ka kamh mi khamhnak le na khamh-dinnak cu ka mit hram fak in ka cuan. 124 Na sal cu a fek mi na dawtnak kha ka hmuhsak law na biaceih lairelnak cu ka cawnpiak ko. 125 Kei cu na sal ka si, lungtliannak ka pe law na cawnpiaknak cu ka hngalh lai. 

126 Bawipa, atu hi cawlcangh caan a si, na Phungbia an buar cang hna. 127 Cucaah na nawlbia hna cu sui, a sunglawi bik mi sui, nakin ka tlaihchan deuh. 128 Cucaah ka nunnak cu na phunglam in ka uk, hrokhrolnak lam vialte cu ka huat hna.129 Na cawnpiaknak cu khuaruahhar an si caah ka zulh hna. 130 Na bia cu aa phuan tik ah ceunak kha a pek, cun santlailo hmanh nih a lung a tliang. 

131 Na nawlbia van hai in ka kaa cu fakpi in ka aan. 132 Ka sin ah i mer law ka zaangfah ko; na min a duh mi hna an covo a si. 133 Thatlonak zei hmanh nih an ka tei nakhnga lo na biakamnak ah fek tein ka dirter. 134 Minung hremnak in ka chanh law na phunglam cu ka zulh hna lai. 135 Na hmai cu na sal cung ah tlaang sehlaw na duhnak cu ka cawnpiak. 

136 Na Phungbia kha zei an rel lo caah mitthli he kaa ciah ko. 137 Bawipa, nangmah cu na dingfel i na biaceih lairelnak cu an thiang. 138 Nangmah hrimhrim nih na dinfelnak cu na tehte ah na chiah cang, amah hrimhrim kha zumhtlak sinak a si. 139 A ka hremtu hna nih na bia an philh cang caah ka thin cu mei bang a lin. 140 Na biakamnak cu tha tein hneksak cangmi a si, na sal nih sunglawi ngai in a cohlan. 

141 Keimah cu santlailo le nautami ka si ko nain na phunglam cu ka philh lo. 142 Na khamh-dinnak cu zungzal in a ding i na Phungbia cu zumhtlak a si. 143 Ngaihchiatnak le lungrawhnak in ka khat i na nawlbia nih a ka hnemh. 144 Na cawnpiaknak hna cu zungzal in an ding, lungtliannak ka pe law ka nung lai. 145 Bawipa, ka lungthin dihlak in kan auh, ka let tuah, cun na biaceihnak cu ka zulh hna lai. 

146 Na sin ah ka au; ka khamh tuah, cun na cawnpiaknak cu ka zulh hna lai. 147 Nangmah sin ah bawmhnak hal awk ah dei hlan in kaa hlau, ka ruahchannak cu na bia ah ka chiah. 148 Na biakamnak ruat len awk ah ralveng hna darkhing an tum hlan poh ah kaa hlau. 149 Bawipa, a fek mi na dawtnak thawng in ka aw cu ngai ko. Na biaceihnak nih nunnak ka pe seh. 150 A ka dawi mi hna cu an khuakhannak tha lo he an ka naihchin lengmang cang, cun na Phungbia he an i hlat chinchin cang. 

151 Bawipa, nang cu keimah nai ah na um, na nawlbia vialte cu an hmaan. 152 Na cawnpiaknak cu zungzal hmun ding an si ti cu tuanpi in rak hngalh ning law zeitluk a that hnga! 153 Bawipa, ka temhinnak hi zoh law ka chanh tuah, zeicahtiah na Phungbia cu ka philh bal lo. 154 Ka tanpi law ka dirkamh tuah, na rak ka kamh cang bang nunnak ka pe tuah. 155 Khamhnak cu mi`halo hna he aa hlat tuk, zeicahtiah annih cu na duhnak kha an kawl lo. 

156 Bawipa, ka cung i na thatnak cu rel cawk lo an si; na biaceih lairelnak bang nunnak ka pe tuah. 157 Ka ral hna le a ka hremtu hna cu rel cawk lo an si nain na cawnpiaknak cu ka mertak hna lo. 158 Hi chimhngai lo phu hna mui nih ka luak a ka chuah; annih cu na biakamnak kha an zul lo. 159 zei tluk in na phunglam ka duh ti cu hmu tuah, a fek mi na dawtnak bang nunnak ka pe tuah. 160 Zumhtlak na sinak cu na bia i muru a si, a hmaan mi na biaceihnak cu zungzal in an tha.

161 Bawi fapale hna nih a ruang lo in an ka dawi nain khuaruahhar lawmhnak he a ka khahter mi cu na bia a si. 162 Keimah cu chawva tampi a hmu mi bang na biakamnak ah kaa lawm. 163 Lihchim cu ka huat i ka fih, kei ka ngeih mi dawtnak cu na Phungbia ca ah a si. 164 A dik mi na biaceih lairelnak caah nikhat ah voisarih kan thangthat. 165 Na Phungbia a daw mi hna ca ah hnangamnak nganpi a si, zei lung le thing hmanh nih a dawn hna lo. 

166 Bawipa, na khamhnak ka hngakhlang, na nawlbia cu ka zulh hna. 167 Na cawnpiaknak cu ka zulh hna, ka tlaihchan tuk hna. 168 Na cawnpiaknak le na biaceihnak hna cu ka zulh hna, zeicahtiah ka lamthluan vialte cu na hmai ah an um ko. 169 Bawipa, ka tahnak cu na sin ah phan hram seh; na bia thawng in lungfiannak ka pe ko. 170 Ka thlacamnak cu na sin ah phan seh, na rak ka kamh bang ka chanh tuah. 

171 Ka hmurka nih na thangthatnak phuang seh, zeicahtiah na duhnak cu na ka cawnpiak cang. 172 Ka lei nih na biakamnak cu phuang seh, zeicahtiah na nawlbia vialte cu an ding. 173 Na kut cu keimah bawmh awk ah timhcia um seh, zeitintiah na phunglam kha kaa thim cang hna. 174 Bawipa, na khamhnak cu ka hngakhlang, na Phungbia cu ka lunglawmhnak a si. 175 Nangmah thang`hat ding lawng ah nung ko ning, na biaceihnak cu a ka bawmtu si hram seh. 176 tuutlau bang ka vakvai, ra law na sal cu ka kawl tuah, Zeicahtiah kei cu na nawlbia a philh bal lo mi ka si.