SALM 106:1-48

Miphun pi sual phuannak , Alleluia!

106. 1 Bawipa cu a that caah a sin ah lawmhnak bia chim tuah u, a fek mi a dawtnak cu zungzal in a hmun! 2 Bawipa teinak cu aho nih dah a rel khawh hna lai, aho dah a thangthatnak cu tling tein a thanh khawh hna lai? 3 Thil dik kha a tuah i dinnak kha aa tlaihpeng mi cu thluachuakmi an si! 4 Bawipa, na mi na dawt hna caah ka philh hlah. 5 Na khamhnak-huham he run ka naih tuah, na thim mi hna lawmhnak cu i hrawm ve ning, na mi hna nuamhnak, na roco hna sunparnak, cu i hrawm ve ning.

6 Kan pupa hna bang kan sual cang, `halo ngai le sual ngai in kan rak cawlcang cang; 7 Izipt i kan pupa hna nih na khuaruahharnak hna sullam cu tling tein an rak hngal lo. Dawtnak he na tuah mi rel cawk lo thil hna cu an lung ah a cam lo, Hluang rili ah khan Cungnung Bik i na nawl cu an rak buar. 8 Sihmanhsehlaw a min `hatnak ca le a lianngan mi a huham hngalhternak caah a khamh hna. 9 A hro hna tik ah Hluang rilipi cu a kao, tithukpi a rak umnak hmun cu thetse ram chung kal bantuk in a tanter hna, 10 cuticun annih kha a dohtu hna kut in a khamh hna, an ral hna kut in a chanh hna.

11 Ti nih an ral cu a phum hna, pakhat hmanh an luat lo. 12 Cu tik ah a chim mi bia cu an zumh i a thang`hatnak hla cu an sa.13 Sihmanhsehlaw an hlawhtlinnak cu an philh zau, a khuakhannak hmanh an hngak lo; 14 ram rocar ah cun duhfahnak nih a rak tei hna, ramking ah khan Pathian cu an rak zuamcawh.15 An hal mi vialte a pek hna, sihmanhsehlaw zawtnak `halo in a den hna; 16 riahbuk ah khan Moses le Bawipa mithiang Aaron cu an rak nahchuah.17 Vawlei cu a kaa aa aan i Dathan kha a dolh, Abiram phu`hen hna cu a kharkhumh hna; 18 an phu`hen ralchanh in meizik a tho, chimh ngai lo hna cu mei nih a hlio dih hna.

19 Horeb ah khan cawfate an i ser, thir thlet mi zuk hmai ah cun an kun; 20 an sunparnak cu ram-ei cawtum milem in an thlen. 21 Annih a rak khamh hna tu, Izipt ah khuaruahharnak tampi a rak tuahtu, Pathian cu an philh, 22 Ham ram ah a tuah mi khuaruahharnak hna le Hluang Rili ah a tuah mi `ihnung thil vialte cu an philh diam. 23 A thim mi Moses nih an karlak ah dir in rak thlauh hlah sehlaw a thinhun in a rak hrawh diam cang hna hnga. 24 Duhnung ram cu zei ah an rak rel lo, a biakamnak kha an i bochan lo; 25 an thlam ah um in an phunzai, Bawipa aw cu an rak ngai lo. 26 Cucaah annih kha a kut a thlirhnawh hna, cucu annih kha ramcar chung ah den hna awk, 27 an tefa hna cu miphun hna lak ah khan den hna awk le annih kha vawlei pumpaluk ah `hekdarh dih awk ah a si.

28 Peor Baal sin ah an pum an i pe, nunnak ngeilo pathian hna sin pekchanh mi rawl an ei. 29 An tuahsernak in a thin an phawh tuk caah an lak ah pulrai a tlunter. 30 Cu tik ah tlangtlak ding in Finehas a tho i rai cu a tian; 31 hi ruangah hin amah cu chankhat hnu chankhat dinnak i meiceu a si. 32 Meribah ti hna ah khan Bawipa cu a thin an phawh tuk caah anmah ca ah Moses nih a rak in, 33 zeicahtiah a lung a fah tuk caah ruah satsai lo in bia a rak chim. 34 Bawipa nih a chimh hna bang khan tuah lo in, miphun dang hna cu an rak hrawk hna lo, 35 anmah tu kha an `hit an vat hna i an nun cu an cawn hna.

36 Kha miphun hna an pathian deu cu an biak, an rap ah an i foih i 37 an fapale hna le an fanule hna tiang khuahrum ah an pekchanh hna. 38 Miding thisen, an fapa le an fanule hna thisen, cu an thlet; Kanaan siasal hna sin ah an pekchanh i khuaram cu thisen in an thurh. 39 Cu bantuk tuahsernak in anmah le anmah an i buar, an nunning cu hlawhhlang nun a si ko. 40 Bawipa thinhunnak cu a mi hna cung ah a alh in a alh, a roco hna nih a luak an chuah.

41 Miphun dang hna kut ah a chanh hna i anmah a dotu hna cu an bawi ah a canter hna; 42 an ral hna nih an lalhnawh hna i an uknak tang ah an cil hna.43 Atu le atu a chanh hna, sihmanhsehlaw hngal nabuin a nawl cu an buar rih, an sualthurnak chung ah an pil chin lengmang; 44 cu hmanh ah an au thawng a theih cangka in an ngaihchiatnak ah a zaangfah hna. 45 Anmah he a tuah mi biakamnak cu a lung ah a cam zungzal, a fek le a liam in a liam mi a dawtnak ruang ah a lung a `hulh `han; 46 anmah a tlaitu hna nih an cung ah zawnruahnak an ngeih ding in a cawl.

47 Bawipa kan Pathian, kan khamh ko, miphun dang hna lakin kan khawm `han ko, cuticun na min thiang cu kan lawmh lai i nangmah thang`hatnak in sunparnak kan hmuh lai. 48 Israel Pathian Bawipa cu zungzal in zungzal tiang thang`hat si ko seh! Mi vialte nih, ‘Amen’, ti hna seh.