SALM 83:1-18

Israel ral hna ralchanh in

83. 1 Pathian, zeihmanh tuah lo in cun um sawh hlah, Pathian, hnangam te le cawl lo cang lo in cun um sawh hlah! 2 Na ral hna nih zeitin an aukhuan, nangmah an huatu hna nih zei bantuk khuakhannak an tuah ti cu hmu ko hna. 3 Na mi hna doh ding in khua an khaan, nangmah an conglawmhtu hna rawiphiar ding khua an khaan; 4 annih nih, ‘Ra tuah u, annih cu miphun sinak in hlo hna usih, cu tik ah Israel min cu philh a si cang lai,’ tiah an ti. 5 Lungrual ngai in rawiphiarnak khua an khaan, nangmah ralchanh in hnatlaknak an tuah, 6 Edom thlam le Ishmaelmi hna, Moab le Hagrimi hna, 7 Gebal, Ammon, Amalek, Filistia le Tairmi hna cu `ang`inak min an thut cang. 8 Lot fale hna tha `hawnter awk ah Assiriami hna hmanh nih an sin ah an `ang ve cang hna. 9 Annih cu Midianmi le Siseriami hna bang tuah hna law Kishon tiva kam i Jabin miphun hna bang 10 En-Dor mi hna cu hloh ve hna; nawn ca ah an `hathnem ngai lai. 11 An hruaitu hna cu Oreb le Zeeb hna bang, an ralbawi hna cu Zebah le Zalmunna hna bang tuah ve ko hna,

12 zeicahtiah annih nih, ‘Ra ulaw Pathian umnak hmun cu kanmah ca ah lak hna usih,’ an ti. 13 Ka Pathian, annih cu hlingkung ro le thli nih a duh in a choih mi favai bang tuah ko hna. 14 Mei nih tupi a kangh bang meizik nih tlangpar a hlio bang, 15 na thinhun in `hio dih ko hna, na thliher in `ihphannak he khahter ko hna. 16 An hmai ah ningzahnak cuang sehlaw, Bawipa, na min cu in au hna seh! 17 Thangchiatnak le `ihphannak cu anmah ta si zungzal seh, thihnak le rawhralnak zong si ve seh. 18 Nangmah lawng nih Bawipa ti mi min cu na pu, vawleicung pumpaluk i Cungnung Bik na si ti cu hngal hna seh.