Fimnak 6

II: SOLOMON LE FIM KAWLNAK

Siangpahrang hna cu Fimnak an kawl a herh

6 1Siangpahrang hna ngai ulaw nan lungfim seh; ram hla bik uktu hna, i ralring u; 2nan kuttang ah tampi an um caah, ram tampi nan uk caah aa phorhlaw mi hna, hihi thei tuah u. 3Zei tin tiah Bawipa nih nawlngeihnak le Cungnung bik nih huham cu an pek hna, amah hrimhrim nih nan tuahsernak cu a ngiat lai i nan i timhnak cu a hlathlai dih lai.

4Cucaah a pennak salle nan si bang in dinnak he nan uk lo, phunglam nan zul lo i Pathian duhnak kha nan tuah lo a si ah cun 5 khulrang le ṭinung in an tlukhnawh hna lai. A sannak ah chiah mi hna cung ah a fak mi biaceihnak a um; 6 minauta hna cu zaangfah in ngaihthiam an si lai nain milianngan hna cu fakpi in hrem an si ve lai.

7 Zei cah tiah zei zongte Bawipa cu aho hmai hmanh in aa zuk lo i lianngannak zong kha khuaruah har in a zoh lo, zei tin tiah amah hrimhrim nih a hme le a ngan he a ser hna i aa khat tein a cawm hna. 8Sihmanhsehlaw huham a hui mi hna cu suthlat biaceihnak nih a hngah ko hna. 9 Cucaah ramuk bawi hna, ka bia hi nanmah ca ah a si; cucu fimnak kha nan cawn i nan palh nakhnga lo caah a si.  10 Zei cah tiah thiannak he a thiang mi thil hna kha upatnak he a tawngtham mi hna cu mithiang ah thanh an si lai i anmah sin in chimhrinnak a hmu mi hna cu anmah i huhphenhnak kha an co lai.11Cucaah nan lungthin cu ka chim mi ah chia ulaw tlaihchannak he ngai u, cun chimhhrinnak kha nan hmuh lai.

Kawl mi Fimnak cu hmuhmi Fimnak a si

12 Fimnak cu a ceu i a dul bal lo. Amah a daw mi hna nih fawi tein an hmuh. 13Amah hmuh a duh mi hna cu amah nih aa hmuhter hmasa hna.  14Amah kawl awkah tuan tein a tho mi hna nih fawi tein an hmuh lai, innka hram ah a rak to ko kha an va hmuh lai. 15Amah kong ruah len cu a muisam tling in hngalhnak a si, cun amah ca ah aa hliphlau mi hna cu lungretheihnak in an luat zau lai. 

16Zei cah tiah amah hrimhrim nih amah he aa tlak mi hna kha khuazakip ah a kawl hna, dawtnak he an lamthluan ah a rak lang i an ruahnak a thawktu a si. 17Zei cah tiah fimnak cu lungthiang tein chimhrinnak ngaih duhnak in aa thawk i chimhhrinnak ngaih duh cu amah dawt a si, 18amah dawt cu a phunglam zulh a si, a phunglam ṭha tein zulhnak nih rawhralnak in luatnak a pek, 19cun rawhral khawh lonak nih Pathian he a kan naihter; 20fim duhnak nih Cungnung bik sin ah a kan hruai. 21 Ramuk bawi hna, bawi ṭhutdan le bawi ṭhiangṭhunh nih nan lung an nuamhter hna ahcun Fimnak hi upat ulaw zungzal in nan uk lai.  

 Solomon nih fimnak fianter a zuam

22 Fimnak cu zei dah a si ti le zei tin dah a rak chuah ti cu atu kan chimh hna lai; zei biathli hmanh ka thup bang lai lo i a karhlan cu aa thawknak kate in ka zulh lai, amah kong kan rak hngalh mi kha biaktak pialtak lo in a dih-umnak in ka langhter dih lai. 23Nahchuahnak phun cu keimah ka hawikom a si lo, zei cah tiah nahchuahnak cu Fimnak he zei pehtlaihnak hmanh a ngei lo. 24Mifim mi lu ah leicung khamhnak a um i siangpahrang fim hna uknak tang ah himnak a um. 25Cucaah ka bia hi cawng ulaw nangmah ca ah ṭhathnemnak a um lai.