SALM 132:1-8

Bawipa kuang thial kum camtuak puai

132 1 Bawipa, David le a ton mi a harsatnak vialte, 2 Bawipa sin ah a tuah mi chiatserh biakamnak, Jacob i zeizongtuahkho Bawipa sin a tuah mi biakamnak, cu philhpiak hna hlah: 3 Amah nih, ‘Ka thlam le ka inn ah ka lut lai lo, ihkhun cung zong ka kai lai lo, 4 hngilh caan zong kaa pe lai lo, ka mit hmanh chinh caan kaa pe lai lo, 5 Bawipa ca ah hmunhma, Jacob i zeizong tuahkho Bawipa ca ah umnak inn, ka hmuh hlan cu,’ a rak ti. 

6 Ngai hmanh, Efrathah ah kan rak theih, Tuupi-Lo ah kan rak hmuh. 7 A umnak hmun ah va kal usih law a kehram ah cun va kun hna usih.8 Bawipa, nang le na thawnnak biakamnak kuang cu, naa dinhnak hmun ah va kai u. 9 Na tlangbawi cu khamh-dinnak kha an i thuam, zumtu hna cu lawmhnak he an au. 10 Na sal David hmai zoh in chiti na thuh mi cu hlaw hram hlah. 

11 Bawipa cu David sin ah chiatserh in bia a rak i kam cang caah, a biakamnak cu a tlolh bal lai lo, ‘Na fapa pakhat cu na bawi `hutdan ah ka thutter lai. 12 Na fapale hna nih ka biakamnak le ka cawnpiaknak hna kha an zulh a si ahcun an fapale hna zong nih zungzal in a bawi tthutdan ah an tthu lai.’ tiah a rak ti. 13 Zeicahtiah Bawipa nih Zion cu a thim cang, a inn ca ah a rak duh cang. 14 ‘Hika ah hin zungzal kaa din lai, ka duh cang bang in hika ah hin khua ka sa lai’ 15 ‘A cinthlak cu thluachuah tampi ka toih lai, a miharsa hna cu khim tein ka chiah hna lai, 

16 A tlangbawi hna cu khamhnak in ka thuamh hna lai, cun a mithiang hna cu lawmhnak hla kha thangpi in ka sakter hna lai. 17 ‘Cuka ah cun David ca ah tefa ciruang pakhat ka chuahter lai, chiti ka thuh mi ca ah meiinn pakhat ka van lai; 18 A ral cu ningzahnak puanlu ka khuh hna lai, cu lio ah a luchin tu cu a par a eng lai.