SALM 105:1-45

Khuaruahhar Israel tuanbia  Alleluia!

105. 1 Bawipa sin ah lawmhnak bia chim tuah u, a min cu au tuah u, a tuah mi cu mi kip sin ah thanh u! 2 Hla in thang`hat u, amah ca ah ringawn dawh tum u, khuaruahhar a tuah mi vialte cu chim `han u! 3 A min thiang cung ah sunparnak um ko seh, Bawipa a kawl mi hna cu i lawm hna seh.

4 Bawipa le a `hawnnak cu kawl u, ngol lo in a umnak cu kawl u! 5 A rak tuah mi hmelchunhnak hna le a tuah mi khuaruahharnak hna le a biakhiahnak hna cu philh hlah u. 6 A sal Abraham ciruang, a thim mi Jacob fale hna! 7 Amah cu Bawipa kan Pathian a si, a biaceih lairelnak cu vawlei pumpaluk ah a cul dih. 8 Chan thong tampi ca ah a tuah mi a biakamnak, a thisen biakamnak cu a philh lo, 9 cucu Abraham he a tuah i Isak kha chiatserh in a rak kamh mi a si. 10 Jacob ca zulhphung ah le Israelmi hna ca ah a hmun mi biakamnak ah a ser, 11 cucu amah nih, ‘Hi Kanaan ram hi, na roram ca ah kan pek,’ tiah a ti.

12 Cucu milu ah chimtlak lo, miram ah barawhzat khual an rak si, 13 ramkhat hnu ramkhat, pennak pakhat in pennak ah an rak vahvaih lio kha a si. 14 Aho hmanh kha anmah hremnak nawl a pe hna lo, anmah dirkamh in siangpahrang hna kha, 15 ‘Chiti ka thuh mi cu tawng hna hlah u, ka profet cu harnak pe hna hlah u,’ tiin a rak cah hna. 16 An ram ah mang`am a tlunter, an rawl cu a lakpiak hna; 17 an hmai in mi pakhat, sal in zuarmi Josef cu a thlah. 18 Cucaah a ke cu cikcin he rit in a hngawng ah thir tlangpi an oih. 19 A caan a phak tik ah a chimchung bia cu a hung tling, Bawipa bia nih thilhman a tuah mi a si kha a langhter. 20 Siangpahrang nih amah thlah awk ah nawl a chuah, miphun dang hna uktu nih a luatter;

21 a chungkhar zohkhenhtu, a chawva vialte kilvengtu, ah a chiah, 22 a bawi fapale hna kha a tha tiin cawnpiak awk le amah ruahnak petu hna kha fimnak cawnpiak awk ah a si. 23 Cu hnu ah Israel cu Izipt ah a va pem, Jacob cu Ham ram ah khua a sa. 24 A mi cu an milu a karhter, an ral hna nakin a `hawnter deuh hna, 25 an lung ah a mi hna huatnak a ser, a salle hna cung ah thilrit kha lethnih in an chuan. 26 A sal Moses le a thim mi Aaron kha a thlahpiak hna. 27 Cuka ah cun a fial mi khuaruahharnak, le Ham ram ah cun a chimh mi hna hmelchunhnak hna cu an tuah hna. 28 Muihnak a thlah i khua a mui, sihmanhsehlaw kha miphun nih cun a nawl an ngai lo. 29 An tiva cu thi ah a canter hna i a chung um nga vialte cu a thah dih hna. 30 An ram cu bawi innkhaan hna tiang utlak in an khat, 31 a bia kaakhat in tho an chuak, cun an ram chung vialte ah fikfa a hrang.

32 Ruahti can ah rialti a tlakter, an ram ah mei a kang; 33 an mitsur ruang le an theipi kung vialte cu tek nih a tlak hna i an ram chung thingkung vialte cu a thluk dih hna. 34 A bia kaakhat in khaubawk le kangkaru rel cawk lo an chuak, 35 ram chung thinghnah hring vialte le leichuak thlairawl vialte cu an ei dih hna.

36 An ram chung i fater vialte, an pasal sinak par vialte cu a den dih hna. 37 Israel cu sui le ngun he a chuahpi, an phun chung ah a thi mi pakhat hmanh an um lo. 38 An chuak tik ah Izipt cu a rak i lawm, zeicahtiah Israel `ihnak nih a rak den hna. 39 Anmah khuh awk ah an cung ah minmei an zam, an lam ceuter awk ah meitompi a chuahter. 40 An hal i nimte sa a thlahpiak hna, an duhzat ei awk ah van in rawl a thlahpiak hna,

 41 lungpi cu a hun i ti an hung pawt, thetse ram ahcun tiva bang an luang. 42 A sal Abraham sin ah a rak ser mi a biakamnak cu a philh lo, 43 a mi cu lawm in, a thim mi hna cu, lawmhnak authawng he, a chuahpi hna. 44 Miphun dang hna ram cu a pek hna, midang nih an thlak mi thlairawl cu an zun, 45 cutin a tuah cu a nawl kha an ngai i a phunglam an zulh nakhnga caah a si.