SALM 89:1-52

Zumhtlak Pathian ca thlacamnak le hla thiang

89 1 Bawipa i a fek mi a dawtnak cu zungzal hla in ka sak lai, chankhat hnu chankhat ka lei nih zumhtlak na sinak cu a thanh lai; 2 zeicahtiah nangmah nih, ‘Dawtnak cu zungzal ca in ser a si,’na rak ti cang, zumhtlak na sinak cu van hna ah khin fek tein na dirh cang hna. 3 ‘Ka Thim mipa he biakamnak ka tuah cang, ka sal David sin ah chiatserh in bia kaa kam cang: 4 na pennak cu zungzal ca ka fehter cang, na bawi `hutdan cu zungzal ka hmunter cang,’ na ti.

5 Bawipa, van hna nih na khuaruahharnak hna le zumhtlak na sinak hna cu na mi hna an i pumhnak ah an thanh. 6 Van ah khin, Bawipa, nangmah he aa tahchunh ding aho dah a um? Pathian fapale hna ahhin aho dah nangmah an zuamcawh ngam ding a um? 7 Pathian cu a mithiang hna pumhnak pi ah khuaruahhar in le a velchum a um mi hna lak ah a lianngan i `ih a nung. 8 Van ralkap run Bawipa Pathian, nangmah bantuk aho dah a um? Lianngan Bawipa, zumhtlak na sinak nih na velchum in an dum. 9 Rilipi porhlawtnak cu na `umter, a tilet hna an thawh tik ah na daihter hna. 10 Rahab cu mithi ruak bang cheuhnih ah na cheu, na ral cu na `hek dih hna. 11 Van hna cu nangmah ta an si i vawlei cu nangmah ta an si, vawlei le a chung um vialte cu nangmah nih na rak ser hna. 12 Chak le thlang cu nangmah nih na ser, Tabor le Hermon nih na min cu lawm in an thang`hat. 13 Na ban cu a `hawng i na kut cu a cak; na orhlei kut cu cung ah na thlir. 14 Khamh-dinnak le a dik mi Biaceihnak cu na bawi `hutdan ke hna an si. A fek mi dawtnak le zumhtlak sinak cu na hmai in an kal. 15 Nangmah conglawmh a thiam miphun cu zei tluk thluachuak dah a si! Annih cu, Bawipa, na umnak khuaceu ah an um lai. 16 Na min ah chun nitlak an i nuam i na khamh-dinnak thawng in cawisan an si.

17 Nang cu an `hawnnak par na si, na mithmai`ha thawng in ka tha nih teinak a kan hmuhpiak, 18 zeicahtiah kan phaw cu Bawipa ta a si; amah cu Israel i a Thiangmi kan siangpahrang a si. 19 Voikhat ah langhnak in bia na rak chim i an zumtu sin ah cun, ‘Paral `ha cu thazaang ka pek cang, ka mi hna lak i thim mi pa cu ka cawisan cang. 20 ‘Ka sal David cu kha ka hmuh i amah cu lawmhnak chiti thiang ka thuh cang. 21 Ka kut cu a cung ah a um zungzal lai i ka baan nih `hawnnak a pek lai. 22 ‘Khuazei ral hmanh nih an hleng kho lai lo i khuazei mi`halo hmanh nih an tei kho lai lo.. 23 A ral cu a hmai in ka cil hna lai i amah a dotu hna cu ka thah hna lai. 24 ‘Zumtlak ka sinak le a fek mi ka dawtnak cu a cung ah a um zungzal lai, ka min `hawnnak in teinak a hmuh lai. 25 A `hawnnak cu rili cung hna ah le a pennak cu tiva cung hna ah ka dirh lai. 26 ‘Amah nih keimah sin ah, “Nang cu ka pa, ka Pathian, ka khamhnak lungpi na si,” tiah a au lai. 27 Cucaah amah cu ka fater, vawlei siangpahrang vialte hna lak i a sangbik ah ka ser lai. 28 ‘A cung ka ngeih mi ka dawtnak fek cu zungzal ka hmunhter lai, a sin ah ka rak tuah mi biakamnak cu a tlolh lai lo. 29 A pennak cu zungzal ca ka dirh cang i a bawi `hutdan cu van hna an hmunh chung poh cu a hmun lai. 30 ‘A tefa hna nih ka phunglam an kaltak i ka `hithruainak an zulh lo a si ahcun, 31 ka zulhphung an buar i ka nawlbia an zulh lo a si ahcun, 32 ‘an palhnak caah fung in le an sual caah hrihrual in ka tuk hna lai, 33 sihmanhsehlaw a fek mi ka dawtnak cu a sin in ka zuk bal ti lai lo, zumhtlak ka sinak cu zeihmanhlo ah ka canter lai lo. 34 Ka biakam cu ka hrawk lai lo, voikhat ka rak chim cang mi ka bia cu ka zuk `han bal lai lo. 35 Ka thiannak in, voikhat ah zungzal ca, chiatserh in bia ka rak i kam cang, David cung ka ngeih mi zumhtlak ka sinak cu ka hrawk `han bal ti lai lo.

36 ‘A pennak le a bawi `hutdan cu ka hmaika i nika bang zungzal in an hmun lai, 37 a fek mi ka tehte ca van ah ser mi thlapa bang zungzal in a hmun lai,’ tiah na rak ti. 38 Sihmanhsehlaw, nangmah nih ― nangmah hrimhrim nih zei na rel lo i na hlawt cang, chiti na thuh mi cung ah na thin a hung cang, 39 na salpa he na tuah mi biakamnak cu na hrawh, a bawi luchin cu vawlei ah na thlak cang. 40 A ralhau cu na pemh dih hna i a ralhruang cu na hrawh dih, 41 a palpah mi kip nih an lawh an ei hna i a innpa hna capo saih awk men ah aa cang cang. 42 Amah a dotu hna orhlei kut cu na `hawnter, a ral vialte na lawmhter hna. 43 Lungpi cung i a vainam cu na lakpiak i raltuknak ah na bawm ti lo. 44 A bawithuam sunglawi cu na lakpiak i a bawi `hutdan cu vawlei ah na thlak. 45 A chan `im hlan ah na tarter i ningzahnak puanlu na khuh.

46 Bawipa, zeitik tiang dah naa thup lai? Zungzal tiang maw? Na thinhunnak cu mei bang in maw a kang duahmah ko lai? 47 Ka chuahnak hi zei tluk in a sau cang ti cu philh hlah? Adam fale hna cu zei tluk man ngei lo in dah na rak ser hna? 48 A thi lo ding mi aho dah a um? Mithi khua in aho dah amah tein a khamh khawh? 49 Bawipa, a fek mi na dawtnak in na rak tuah mi biakamnak vialte cu khuazei ah an si dih cang? Zumhtlak na sinak in David sin ah biakamnak na rak tuah cang. 50 Na salpa nih a in mi serhsatnak cu philh hna hlah. Miphun hna zomhtaihnak hna, 51 Bawipa, na ral hna nih an chim mi, chiti na thuhmi pa kehram tiang an phakpi mi zomhtaihnak vialte cu ka philh hna lo. 52 Bawipa cu zungzal in thang`hat si ko seh. Amen. Amen.