SALM 73:1-28

Dinnak in teinak

73. 1 Pathian cu Israel cung ah, Bawipa cu milungthiang hna cung ah, a `ha hringhran ko. 2 Ka tlu deng, tlawmpal ah ka tolh cang lai, 3 a ruang cu mi`halo hna le mipuarthau hna an huncho ka hmuh tik ah ka rak hngar hna. 4 Annih cu, cu bantuk fahnak le retheihnak an ngei lo, hnangam hirhiar in an um; 5 minung covo a si mi fahnak in an luat, Adam fale hna i ngaihchiat nganfahnak kha zei hmanh an i hrawm lo. 6 Cucaah porhlawtnak cu `hi bang an i oih, zaang-ennak cu hnipuan bang an i hruk. 7 An thau in `hatlonak a pawt, an lung in ziarngeihnak a zut. 8 Chiatnak lei in kan chim ahcun annih cu `hatlonak le zaang-ennak tha a pe mi an si. 9 An hmurka in cun vancung an ti nain an lei in cun an i hlat tuk rih. 10 Cu ruangah ka mi nih annih cu an fukpanh hna i rumnak ti kha tampi in an hmuh, 11 cun annih nih, ‘Pathian nih zeitindah a hngalh khawh lai?’ Cungnung Bik nih zei bantuk hngalhnak dah a ngeih khawh lai?’ an ti. 12 Mi`halo hna cu cu bantuk mi an si, lungretheihnak zei hmanh um lo in chawva tampi an khon. 13 Ka lungthin kha thiang tein ka rak chiah le ka kut thiang te ka rak i `awl cu pakpalawng maw a rak si cang? 14 Chun nitlak an kuttum nih ruahti bang a rak ka tlak i zing fatin dan an rak ka tat tik ah khan, 15 ‘Anmah bantuk in bia ka chim lai,’ ka rak ti ahcun na fale phun cu ka rak rawi diam cang hna lai. 16 Cucaah hihi hngalhthiam ka rak i zuam: zei tluk in dah a rak har! 17 Cucu pathian hna hmun thiang ah ka kal tik ceo ah anmah bantuk a si mi hna cung ah zei dah a cang ti cu ka lung a fiang. 18 Chengpalang nalpi ah na chiah hna i hnangamnak a um lonak hmun ah na thlak hna. 19 Aho hngal lo in an rawhnak cu zei tluk in a ran! An lo, thlalaunak nih a hloh dih ko hna. 20 Bawipa, mang bantuk a si ko, naa hlauh tik ah an mui cu na hloh dih cang hna. 21 Ka lung a fak tuk, ka ngeih mi tlaihchannak vialte an car dih cang. 22 Na hmai ah kei cu mihrut le zei hngal lo mithathu le saram men ka si ko. 23 Cu hmanh ah, na hmaika ah ka um ko, na orhlei kut in na ka tlaih; 24 ruahnak `ha in na ka hruai lai i na sunparnak lei ah na ka hruai lai. 25 Vancung ahcun nangmah hlei keimah ca ah aho a um ti? Cun, nangmah he cun, vawlei ah herh mi zei hmanh ka ngei ti lo. 26 Ka lungthin le ka taksa cu an ciam i an maan dih cang hna; nangmah cu ka lungthin lungpi, ka covo, zungzal Pathian na si. 27 Biatak in, nangmah an kaltak mi hna cu an rawk lai; `angdangpom in an kaltak mi hna cu na hrawh hna; 28 cu lio ah Pathian naih i um cu ka lunglawmhnak a si. A thil tuah mi vialte thanh awk ah Bawipa Pathian cu kaa dornak ah ka ser cang.