SALM 116:1-19

Lawmhnak pek , Alleluia!

116. 1 Bawipa nih ka aunak aw le ka thlacamnak cu a ka ngaih piak caah, amah cu ka dawt. 2 Keimah lei ah a hna a chit caah ka nunchung vialte amah cu ka au lai. 3 Thihnak zunhri nih a ka kulh, Mithi khua rap hna nih fek tein an ka tlaih; ngaihchiatnak le lungrawhnak nih an ka tlaih`hup, 4 Bawipa min cu ka au. Bawipa, ka chanh tuah, kan nawl hram ko. 

5 Bawipa cu a ding i zaangfah a thiam, kan Pathian cu a nun a nem. 6 Bawipa nih milungthiang kha a zohkhenh hna, an ka thlak tik ah tha a ka pek. 7 Ka thinlung, hnangam tein um `han tuah, zeicahtiah Bawipa nih dawtnak he an zohkhenh cang. 8 Keimah cu thihnak in, ka mit cu mitthli tlaknak in le ka ke cu tlukrilhnak in a ka chanh cang. 9 Ka nunnak caan cu Bawipa hmai ah, a nung mi hna umnak ram, ah ka dihter lai. 

10 ‘Lak awk ka um ti lo,’ ka ti hmanh ah ka bochan rih ko 11 Ka thinphan in, ‘Aho hmanh rinhchan khawh an si lo,’ ka rak ti. 12 Ka cung i a siannak caah Bawipa cu zei dah ka cham khawh lai? 13 Khamhnak hrai cu ka thlir lai i Bawipa min cu ka auh lai. 14 Bawipa sin ka biakamnak cu zapi hmuh in ka tlinter lai. 15 Amah a zum mi pakhat thih cu Bawipa ca ah a fak ko.

 16 Bawipa, kan nawl ko! keimah cu na sal ka si, kei cu na sal ka si i ka nu cu na salnu a rak si; ka cikcin cu na rak ka phoihpiak. 17 Lawmh thawinak cu kan pekchanh lai i, Bawipa, na min cu kan auh lai. 18 Bawipa sin ah ka biakamnak cu zapi hmuh in ka tlinter lai, 19 Bawipa inntual ah, Jerusalem khualipi laifang hrimhrim, ah ka tlinter lai.