SALM 74:1-23

Biakinn an hrawh ca `ahnak

74. 1 Pathian, zeicahdah na kan hlawt taktak; na zohkhenh tawn mi na tuu hna cung ah na thin cu mei bang a alh? 2 Hlan na mi ah na lak mi, na rak tlanh mi na miphun le na umnak ding naa lak mi hi Zion tlang cu philh sawh hlah.

3 Hi a rawk dih cikcek mi ah hin hung kai tuah! Ral nih hmun thiang chung thil vialte cu an hrawh dih cang; na ral hna nih pumhnakpi hmun ah an aukhuang cang, 4 An hmelchunhnak, hlan rak hngalh bal lo mi hmelchunhnak, cu luhnak kutka cung ah an tar cang. 5 An hreitlung in 6 thlalangawng tlang hna cu an den hna, hreitlung le sobul in an phomh hna; 7 na hmun thiang cu mei in an khangh, na min umnak inn cu serhsatnak he vawlei ah an thlak. 8 Anmah le anmah cu, ‘Voikhat den ah khuai dih hna usih,’ an i ti! Ram chung pathian inn vialte hna cu an khangh dih hna. 9 Zei melchunhnak le profet hmanh kan hmu kho ti lo, cun zeitik tiang a rau lai cu aho hmanh nih kan hngal lo. 10 Pathian, zeitik tiang dah ral nih na min thangchiatnak cu an chim rih lai? Na ral nih na min cu zungzal in maw serhsat ding a si? 11 Zeiruangah dah na kut cu naa sum, na orhlei kut cu na angkileng zal chung na nawh? 12 Asinain, Pathian, a thawk tein nang cu ka siangpahrang, vawlei pumpaluk ah khamh- dinnak a sertu na si, na `hawnnak in rili cu cheuhnih ah na cheu, 13 cun ti chung saram mangtara hna lu hna na cumh i na khuai hna. 14 Leviathan lu cu na rial i ramsa hna kha na fah hna. 15 Cerh le ti cu na chuahter i hlan tiva hna cu ramcar ah na ser hna. 16 Chun le zan cu nangmah ta an si, ni le ceunak na umter, 17 vawlei ramri vialte na ser dih hna, `hal le khuasik cu na ser hna. 18 Bawipa, na ral nih an in thangchiatnak cu philh hlah, mihrut miphun nih na min cu an serhsat. 19 Na `huro te cu sahrang kut ah chan hlah; hrem mi na mi hna nunnak cu zungzal in philh hna hlah.

20 Na biakamnak cu zoh `han tuah! Ram chung i hmunking vialte cu buainak sertu hna in an khat cang. 21 Namneh mi hna cu lungfim loin kirter hna hlah, misifak le miharsa hna cu na min thang`hatnak ding ca caan `ha cu pe ko hna. 22 Pathian, tho law kian hna hlah, mihrut hna nih zeitindah chun nitlak in an in thangchiat ti cu philh hlah! 23 Na ral hna authawng, zual lei ah a panh mi an dotu hna aukhuannak cu philh hlah.