SALM 90:1-17

Minung derthawmnak

90. 1 Bawipa, nangmah cu chankhat hnu chankhat kaa dornak na si.

2 Tlang hna an um hlan, vawlei le leicung hna an rak chuah hlan ah, zungzal in zungzal tiang Pathian na si. 3 ‘Adam fale hna, kir `han u,’ na ti i minung phun cu leidip ah na kirter `han hna. 4 Nangmah ca ah kum thongkhat cu a liam cang mi nizan le ralvengtu hna caankhat bantuk men a si. 5 Hngilhnak tilet in na kalpi hna, ― zingka ah cun ramno bantuk men an si, 6 zingka ah a corh i a par, zanlei ah cun a uai i a car cang. 7 Zeicahtiah kannih cu na thinlinhnak nih a kan hrawh i na thinhunnak nih a kan lauter. 8 Kan sualthurnak cu naa chinchiah hna i na hmaika ah kan biathli hna cu biathli an si ti lo. 9 Kan chan cu na thinhunnak tang ah an liam i kan nunnak cu voikhat thawchuah in an dih ko. 10 Kan chan cu kum sawmsarih ―a `hawng mi cu kum sawmriat ― sihmanhsehlaw hi vialte cu lungretheih vansannak in a khat, chikkhate an lang i an lo `han. 11 Aho nih dah na thinhunnak hmual cu a hngalh, aho nih dah na thinlinhnak cu a `ih? 12 Kan chan hi rel kan thiamter law kan lung a fim lai. 13 Bawipa, rak kir `han ko! Zeitik tiang dah kan in hngah lai? Na salle hna cu kan zaangfah ko. 14 Zing fatin a fek mi na dawtnak in kan khahter law nikhat chung kan i nuam lai i hla kan sa lai. 15 Kan i nuamhnak cu ngaihchiat kan rak in caan tluk le harsatnak kan rak ton kum tluk in au ve hram seh. 16 Na salle hna hi na tuahsernak kan hmuhsak hna law an fale cu na sunpar lianhngannak ah i nuam hna seh. 17 Kan tuah mi a lung a tling nakhnga Bawipa i thlum-alnak cu kan cung ah um ko seh.